Online News Khabar

युनिकोड

शुभकालिका सरकारका झण्डै दुई बर्षः थौरै आशा प्रशस्तै निराशा

1.5k
SHARES
1.7k
VIEWS

स्थानीय तहको प्रथम कार्यकालको सरकारमा रहेका छिद्र देखाउदै, असन्तुष्टीको विकल्पमा गठबन्धनको गाभे गाठो बनाएर उदाएको शुभकालिका सरकारको झण्डै २ बर्षको कार्यकाल सन्तोषजनक नभएको गुनासो सर्वत्र सुनिएको छ । गठबन्धन दलकै नेता कार्यकर्ताहरु न्याउरी मारी पछुतो भएको अभिव्यत्ति दिईरहेका भेटिन्छन । गठबन्धन दलबाटै निर्वचित काम गरेर देखाउने हुटहुटी भएका जनप्रतिनिधि समेत नेतृत्वको असक्षमताको उपहास गरिरहेका छन । गठबन्धन दल माओवादी र कांग्रेस कार्यकर्ताले अपेक्षा गरेको गतिमा विकास नभएको सत्य लुकाउन मिल्दैन । सत्तामा जो गए पनि उस्तै हो भन्ने भाष्य एकातिर छ भने अर्कोतिर सिद्धान्त नमिल्ने बीचको गठबन्धन गलीको गाँड जस्तै हो भन्ने बुझाई जन्मेको देखिन्छ । यो गठबन्धन विजय गराउन पैतला देखिको बल लगाएर लागेका कतिपय कार्यकर्ताहरु आफुहरु व्यर्थैमा बलीका बोका भएको स्वीकार गर्दछन ।
शुशासनको सपना तुहिएको छ । संम्भावनाका साड्लाहरु चुडिएका छन् । पारदर्शिताका प्वालहरु बन्द भएका छन । नातावाद र कृपावाद झन टुसाएको छ । विकासको वजेट खान पल्केका ढाडे विरालाहरु झन सल्बलाएका छन । योग्य कर्मचारीको बहिर्गमन र अयोग्य कर्मचारीको हालीमुहाली भएको गुनासो पनि बजारमै सुनिन्छ । अनुभवी कर्मचारी हटाएर लिखित परीक्षा विनानै सदस्यता हेरेर नियुत्ति दिने प्रणालीको अन्त्य गर्ने कि नगर्ने ? सरकारी बजेट आफ्नो पैतृक सम्पति ठानी दामासाही गर्ने नेता,कर्मचारी,उपभोत्ताको मुखमा मुगालो कहिले लाउने ? आजको जनताले भष्टाचारका जरा उखेल्न खोजेको छ । स्थानीय सरकार संचालन ऐन लगायतका दस्तावेजले चौमासिकरुपमा प्रत्येक वडा तथा गाँउपालिकाका सबै शाखाहरुको तेसो पक्षको रोहवरमा सार्वजनिक सुनुवाई र समिक्षा खोजेको छ । हामी त बार्षिक खर्च प्रतिवेदन पनि पाँउदैनौ किन ? स्थानीय तह संस्थागत क्षमता स्व मुल्यांकन (LISA) र वित्तिय शुशासन जोखिम मुल्यांकन(FRA)माकालीकोट जिल्लाकै अन्तिम गाँउपालिका बन्दा पनि सरकारको ध्यान किन शुशासन र क्षमता विकासमा जादैन । यसै प्रतिवेदनबाट प्रष्ट हुन्छ कि हामी कतै अवश्य चुकेका छौ ।

योजना तर्जुमा तथा कार्यक्रम निर्माणमा गम्भिर बहस नगर्दा योजनाहरु स्तरीय बन्न सक्दैनन । पुँजीगत बजेट बढाउन अनावश्यक चालु बजेट कटौती गर्न अनिवार्य छ । कतिपय वडा तथा पालिकाले समेत पुँजीगत बजेटलाइ प्रशासनिक खर्च , राहात वितरण तथा कर्मचारी तलबभत्तामा खर्च गरिएको पाईयो । यस विषयमा सुधार गर्न नसके गाँउपालिकाको विकासमा गम्भिर असर पर्दछ । शुभकालिका सरकारका दुई बर्ष अनुभव बटुल्दै गुज्रेको छ । विकासमा सहकार्य र स्तरीय सेवा सहितको शुशासनको ठोस योजना हालसम्म बनेका छैनन । भर्ता सुकाटिया जोड्ने सडकको बीच खण्ड यथावत राखिएको छ । सामाजिक सुरक्षा जनताको घरमा वितरण गर्न सकिएको छैन । केही वडाको पहलमा राष्टिय प्रशारण लाईन जोड्नु स्वागतयोग्य कार्य हो । तर सबै वडामा राष्टिय प्रशारण लाईन जोड्नु जरुरी छ । लोकसेवा तयारी कक्षा नलिएका विद्यार्थीको नाममा रकम भुत्तानी हुनु । कोपिला स्याहार केन्द्रमा बन्दोबस्तीको सामाग्रीमा रु ३० लाख खर्च गरिनु, विधि नवनाईउपचार खर्च बाड्नु, वडामा विनियोजन हुने बजेट अत्यन्तै न्युन हुनु । प्रदेश तथा संघबाट ठूला योजना आउन नसक्नु , समयमै सामाजिक सुरक्षा वितरण नहुनु, लामो समयसम्म लेखापालको व्यवस्था गर्न नसक्नु जस्ता समस्याहरुले गाँउपालिका सरकार शुशासन र विकासको मुद्धामा कमजोर सावित भएको प्रतित हुन्छ ।
गाँउपालिकाले शुभकालिका विकासको खास मोडेल निर्माण गर्न नसक्दा यो गाँउपालिका ५ बर्ष पछाडी धकेलिएको निष्कर्ष सरोकारवालाहरुले निकालेका छन । विकासमा टोल विकास संस्थाको परिचालन, गुणस्तरीय शिक्षामा विशेष कार्यक्रम, शिक्षा स्वास्थ्य र कृषिमा रुपान्तरणको लागि निर्मम बहस जरुरी छ । सरकार झिना मसिना विवादमा अल्झिनु हुदैन । फजुल खर्च कटौतीको ठोस योजना बनाउनै पर्दछ । राजनैतिक दलहरुलाइ योजना अनुगमन तथा प्रगति समिक्षामा अनिवार्य सहहभागी गराउनु पर्दछ । चौमासिक समिक्षा र सार्वजनिक सुनुवाई अनिवार्य गरिनुपर्दछ । हरेक गतिविधिमा शुभनै हुने संकेत होला सोचेका यहाँका नागरिकमा अशुभको संकेत देखा परेपछी निराशानै निराशा पैदा भएको छ ।

यस लेखका लेखक
शुभकालिका गाउँपालिका ६ हाउडीका पुष्पराज आचार्य हुन ।

यो खबर पढेर तपाईलाई कस्तो महसुस भयो ?
शेयर गर्नुहोस:

Discussion about this post

छुटाउनु भयो कि ?

Related Posts

भर्खरै प्रकाशित